Smått er godt - eller smått stell
Smått er
godt, sa vi før. Men i dag kan ikkje stort bli stort nok.
Troms og Finnmark var for små. Hordaland og Sogn og Fjordane
også. I det nye fylket Viken bur det i dag 1,2 millionar som plutseleg skal spele
på lag. Dei om det. I vårt eige fylke held vi enno futedømmestriden levande og
synest Sunnmøre er evig nok.
Fisk og svovel
Pandemien har ført til at vi for lengst har fått amerikansk action
og tanketomme sitcoms langt opp i halsen. Men no kan vi strøyme filmar
og seriar og velje vår eiga tidtrøyte.
Akkurat no er det islandsk det går i på vår skjerm.
Island luktar fisk og svovel. Naturen er brutal. Det er
langt til alle grannar. Men det er også eit land som hevdar seg. Film- og TV-produksjonen,
som det meste anna, held internasjonale mål. Som bonus får vi eksotiske
omgjevnader og eit språk som vi nesten forstår og som er ei lyst å høyre på.
Island har ein mektig litteratur og stolte tradisjonar og tenner
framleis lysande internasjonale stjerner innan idrett, kultur og show-bis. Når vi
tenkjer på at landet dei har færre innbyggjarane enn Møre og Romsdal pluss gamle
Sogn og Fjordane og samanliknar, må ein bli imponert. Men slik er det: Vil ein
vere ein nasjon, må ein også fylle dei
funksjonar som trengst.
Og då greier ein det. Det er ikkje alltid dei største landa
som står øvst på pallen i VM. Talenta finst, over alt. Det er miljøet og viljen
til å satse det kjem an på. Små miljø kan gjere stor forskjell: I fjordbygdene våre hadde småbrukarar store
draumar og bygde fabrikk i eiga fjøre. Dei hadde lite utdanning og pengar, men
dei lærte seg språk, design, marknadsføring og data langsmed. Slik dyrka ein
talent og kunne hevde seg i konkurransen sjølv om ein heldt til langt unna
pengefolk og store marknader.
Signalbygg
No drenerer utdanningssystemet og arbeidsmarknaden bygdene for ungdom og talent og lokkar dei til storbyen. Vi
gamlingane sit igjen. Staten går i spissen for sentraliseringa og reiser det
eine dyre signalbygget etter det andre i hovudstaden. Vi skal unne storbyen det
nye Nasjonalmuseet, Munch-museet og Nye Deichmanske. Men det enorme regjeringskvartalet
kunne ein godt teikna på nytt og gjort mindre slik at statens kompetansearbeidsplassar
kunne kome ein større del av landet til gode.
Sentraliseringa armar ut distrikta og skaper unødig press på
hovudstaden. Det kostar lite å rette på det. Nye arbeidsplassar blir alltid tekne
imot med hornmusikk i resten av landet. Hovudstaden kunne ha puste letta ut.
Men det er problematisk, knirkar regjeringa. Flinke tilsette vil ikkje flytte
med. Kontora vil tape kompetanse. Nye medarbeidarar blir det veldig vanskeleg å
finne ute i provinsen. Akkurat no er det plasseringa av regjeringa si eksportsatsing
Business Norway det gjeld. Ålesund står med opne armar og vil ta imot. Men
ikkje ein gong Garantiinstituttet for eksportkreditt (GIEK) på Frognerstranda
ser det ut til at staten greier å gi slepp på til Ålesund og Bergen.
Satsingsområde for Instituttet er blant anna el-ferjer, sjømatnæringa og
havvind i tillegg til verftsnæringa generelt.
Kan det verkeleg tenkjast at det finst folk på kysten som har innsikt i
slikt?
Graset gror
Medan graset gror i distrikta, blir det stadig meir
uoppnåeleg for vanleg folk å skaffe seg eit tenleg husrom i hovudstaden. Men I staden for å
flytte jobbar ut, tenkjer regjeringa motsett. Storsamfunnet brukar store midlar
for å byggje jarnbane, slik at folk i Hamar og Moss kan pendle heimanfrå til kontorjobbane
sine i Oslo. Det blir kalla eit distriktstiltak.
Det blir ofte snakka om distriktsstøtte og
stimuleringstilskot til utkantane. Men er det nokon som har sugerøyr i
statskassa, er det hovudstaden. Ein tredjepart av alle statleg tilsette held til
i Oslo. Der finst det nesten like mange statlege tilsette som det er
innbyggjarar i Finnmark.
No treng vi ei regjering som synest at smått er godt. Viss
ikkje, blir det smått stell.
(Synspunkt Nyss 07052021)
Kommentarer
Legg inn en kommentar