Maskert kvardag
Pandemien lakkar mot slutten. Bank i bordet: Vi kan snart kaste maska - viss vi vil.
I lang tid har vi kledd
oss som bankranarar i butikken. Vi nikkar og smiler usynleg bak maska når vi
ser nokon det kanskje er noko kjent med. Men det er vanskeleg å orientere seg
når det einaste vi har å halde oss til er eit par mysande auge i den smale stripa
mellom topplua og munnbindet.
Då er faktisk litt spesielt at det akkurat i desse dagar har
blussa opp ein hissig debatt om hijab i sosiale media. Stilige mørke damer gjer
suksess på catwalken med skaut rundt hovudet og får tyn i kommentarfelta fordi
dei ikkje tek avstand frå plagget. Men damene svarar tilbake: Hendene vekk frå
hijaben min, seier fotomodellen Rawdah Mohamed.
For hijab er noko anna enn burka og nikab som stenger for
både inn- og utsyn og held kvinnene effektivt lenka til kjøkkenbenken. Hijaben
er eit skaut og skjuler ikkje meir av hovudet enn dei kunstferdige knytte
skjerfa som norske damer snurrar fire gongar rundt halsen eller ein vanleg
hettegenser.
Hadde nokon for nokre år sidan
fortalt oss at vi alle skulle kome til å gå rundt med maske på offentleg stad,
ville vi nok rista mykjeseiande på hovudet. Det gjekk ikkje lenge før vi
hadde munnbinda parat. No ristar vi mykjeseiande på hovudet kvar gong andre
hadde gløymt seg.
For munnbind er noko herk, men vart fort ein vane. Og maskene
har også visse fordelar, og ikkje berre når ein skal rane bank. Munnbind
fungerer også mot vanleg forkjøling og influensa. Ein veit aldri når nye
pandemiar kan dukke opp. Og då har vi ikkje ein gong nemnt den framveksande
ansiktattkjennings-teknologien. I Kina filmar dei fotgjengarar i gatekryssa og
greier å kjenne att dei som går på raudt, slik at dei kan få si straff.
Teknologien breier raskt. Ein eller annan finn nok snart ut at det er lønnsamt
å filme og kjenne att også oss og slik få eit meir intimt forhold til våre lommebøker.
Skal vi unngå å bli
attkjende, må vi kanskje dra ei nylonstrømpe over hovudet før vi går heimanfrå.
Eller meir behageleg, trass alt: bruke ansiktsmaske. Slik kan munnbind fort bli
del av framtidas daglege grunnutrusting. Det skulle i tilfelle borge for ei
framtid for vår lokale maskeprodusent.
Nyare forsking har meir godt nytt for dei som lagar munnbind:
Universitetet i Cardiff viste ein masse bilde av menn med og utan ansiktsmaske
til eit utval kvinner og spurde dei kven dei likte best.
Resultatet var uventa: Kvinner synest menn med munnbind er
klart meir attraktive enn dei som er utan. Og det er ikkje dei stilige, mørke munnbinda
som står i stil til blådressen som gjer utslaget. Det er karane med dei vanlege,
lyseblå eingongsmaskene som tek pokalen.
Verkar vi meir
ansvarlege med maske? Er det romantikken frå dei tradisjonelle legeromanane som
slår inn? Eller er det kanskje slik: Di mindre damene ser av oss karane, di
betre er det.
Kommentarer
Legg inn en kommentar