Utvandrarar
No er det
vanlege folks tur, seier regjeringa og rike nordmenn rømmer frå landet.
Den idioten, utbraut investor
Jan Petter Sissener om finansministeren då framlegget til neste års statsbudsjettet
nyleg vart lagt fram. Han gjorde seg morsk og spådde at mange norske superrike
ville flagge ut på grunn av skattetrykket. Her ligg det nær å sitere Vilhelm
Moberg: Om ein rik idiot seier vi at han er rik. Om ein fattig idiot seier vi
at han er ein idiot.
Vilhelm Moberg var
den folkekjære forfattaren bak bøkene om dei som emigrerte frå Sverige til
Amerika. I «Utvandrerne» fortel han om ein
ung familie, om den lammande fattigdommen som tvinga dei til å reise heimanfrå og
om farane og dei praktiske og kjenslemessige utfordringane som venta dei på
andre sida av havet. Bøkene, og seinare filmen, nådde eit stort publikum. Ein
ny Utvandrerne-film er aktuell i desse dagar, med norske Erik Poppe som
regissør. Historia har framleis brei appell: Historia om den vesle familien sin
kamp for eksistensen rører oss i dag på same måte som då bøkene først kom ut i
1949.
Like rørt blir vi ikkje av dagens utvandrarar, som med paukar
og trompetar og store oppslag i media rømmer landet grunna forslag om ein ekstra
vri på skattebrytaren. Dagens utvandrarar vil heller bu i land som har
romslegare vilkår for store formuar. Kva slags rett har vel ein skattefut til å
rote rundt i pengebingane som dei sjølve har samla i hop og sjølve vil
disponere over? Spådommane dei kom med var dystre. Arbeidsplassar vil forsvinne,
investeringar vil tørke inn, næringslivet vil flagge ut og tolleknivar og
trollkjerringar vil regne frå himmelen.
Vi vil jo alle bu i
eit land med små forskjellar, med sterkt fellesskap og høg tillit. Stor økonomisk
og sosial ulikskap aukar motsetningane i samfunnet og minskar tilliten. I siste instans svekker det det demokratiet. Det
er vi ganske samde om.
Likevel går utviklinga med raske steg mot større ulikskap.
Dei fattige blir fleire. Dei rike blir rikare. I perioden 2001- 2018 auka den rikaste prosenten av
folket si brutto inntekt med 175 prosent. Bruttoinntekta til den fattigaste
halvparten auka med berre ti prosent. I denne perioden hadde den rikaste prosenten
ein vekst i si netto formue med 120 prosent. Den fattigaste halvdelen av folket
hadde ein formuevekst på berre 20 prosent. I 2018 disponerte dei ti prosent
rikaste i landet over halvparten av all netto formue i landet. Det er ikkje til
å kome frå: Vi er på god veg til å utvikle overklasse og underklasse. Det er
ikkje lenger korkje mogleg eller rettferdig med like kutt over heile fjøla. Nokre
må faktisk yte meir.
Og vi vil jo alle så vel.
Men det er så rart med det: Idealismen taper gjerne når bankkontoane våre tek
ordet og fortel kva som er best. Men unntak finst. 30 år gamle Marlene
Engelhorn, einearving til BSAF-formuen på 120 milliardar kroner og busett i
Wien, har vekt oppsikt. Ho insisterer på å betale 90 prosent i arveavgift. «Eg
kan berre åtvare mot at samfunnet blir
overlate til styrtrike menneske sin velvilje» seier ho. Ho har også starta organisasjonen
taxmenow, som mellom anna arbeider for å få gjeninnført skatten for store
formuar. Vel 85 000 personar, etter seiande også mange bedriftsleiarar og
formueseigarar, har slutta seg til.
Den omvendte skatteprotesten frå Wien er naturlegvis meir
enn kuriositet enn ein trend. Slike oppofringar som ho går inn for, krev vi
ikkje av Røkke og Fredriksen-døtrene. Vi vil berre at dei skal vere med på eit
løft for fellesskapen. Ein innsats for
den norske modellen. Ein liten dugnad for det Noreg vi kjenner og er glade i.
Men pengar bestemmer, og di meir ein
har av dei, di meir styrer dei våre handlingar. Det at milliardærar flaggar
ut frå Noreg og statistikken, gjer naturlegvis sitt for å minke ulikskapen. Men
når dei tek formuane med seg, er det eigentleg ei ganske fattig trøyst.
Kommentarer
Legg inn en kommentar