Gamle gubbar
Gubba noa! Han har nok rett i at det er stort sett er eldre
og halvgamle gubbar som står bak krig og elendigheit. Eg er jamgammal med Putin.
Eg synest likevel det er eit stivt stykke å meine at eg skal ha ansvar for overgrepet mot Ukraina.
Shadowsmusikk
Elles er eg på linje: Vi oldisar har absolutt ein heil del å
stå til rette for. Vi kan ikkje nekte for at vi er stive i tankegangen. Vi går
og snakkar sakte. Vi spelar shadowsmusikk. Vi fumlar med kontantar i
butikk-køen og vi har kanskje drege stigen opp etter oss reint økonomisk. Mange
av oss har lett for å ønskje oss tilbake til gamle dagar - som for eksempel tilbake
til den kalde krigen.
Om nokon spør oss om ei teneste ein formiddag, blir vi
stressa viss vi også skal noko om kvelden. Men kanskje i neste veke. Og på dagtid!
Vi tek det med ro heime og køyrer dieselbil til hytta for å slappe endå meir
av. Samtidig må dei unge knoge med jobb og familie og ligge svevnlause om natta
på grunn av klima-trusselen. Vi har kort tid igjen, men gir oss god tid. Alderen
har mange plager og dei likar vi godt å prate om når vi stappar i oss av livets
dessert.
Men også vi veit at
ei eldrebølgje tårnar seg opp framfor oss. Snart vil ein
tsunami av grått hår og spaserstokkar slå inn over fedrelandet. Gamle folk
blir mykje eldre enn før. I 1970 hadde ein 65-åring i gjennomsnitt 15,3 leveår
att. i 2020 hadde jamaldringen hans 21,3 år igjen. I 2060 vil han truleg ha
26,3 år att å leve.
Ferierer borte og heime
Då blir det mange
fleire år å reise på langtidsferie og treffe jamaldringar i Torrevieja og Costa
del Sol. Vi ferierer borte og vi ferierer heime. Dei unge må stå i arbeidslivet
til dei er fleire og sytti for å betale dei aukande utgiftene til alderstrygda.
Oljefondet, som vi for lengst har døypt om til pensjonsfond, kjem nok også til
å gå med. Alt no er det ei galopperande krise i eldreomsorga. Og før 2060 vil
talet på innbyggjarar over 80 vere tre gongar så høgt som i dag.
Og mykje, mykje verre skal det bli, slår leiaren for Helsepersonell-kommisjonen,
professor Gunnar Bovim, fast. Problemet er ikkje først og fremst pengar. Men vi
er så få her i landet. Heretter tyder to nye sjukepleiarar til eldreomsorga to
færre ingeniørar til Norsk Hydro, spissformulerer han.
Og utan ingeniørar stoppar Noreg. Framtida ser mørk ut. Det
er hardt å vere menneske. Prøv det den som vil. Det nyttar lite å forklare at eldrebølgja
har historiske årsaker. Mykje skuldast at våre forfedrar miste sex-lysta ved
inngangen til andre verdskrigen og at dei tok det så grundig igjen fredsvåren i
1945 og dei følgjande åra. Slikt skaper ubalanse i befolkningspyramiden og krise i eldreomsorga nesten
hundre år etterpå.
Trøystetanke
Ein liten trøystetanke: Frykta for eldrebølgja og samanbrot
i omsorgssektoren byggjer på statistikk over kor mange av oss som til ei kvar
tid er over 80 år. Men når levealderen aukar år for år, blir vi vel spreke lenger
også.
Eit fromt ønskje er i
alle fall at ungdommen hevar blikket frå Iphonen og kastar kåte blikk på
kvarandre. Det må ein dugnad til og her nyttar det ikkje å appellere til spreke
pensjonistar. Vi minner om den gongen for eit halvt hundreår sidan, då
folketalet i Trondheim auka så mykje at det truga Bergen som landets nest
største by. Bergensarane mobiliserte. By-patrioten og teiknaren Audun Hetland illustrerte
og ordførar Harry Hansen kom med denne manande
bodskapen: «Ligg dokker sammen og gjorr nokke!
Kommentarer
Legg inn en kommentar