Vårfornemmelsar
Miljø-klokka tikkar ubønhøyrleg mot Paris-måla som vi ikkje ser ut til å nå. Klima-katastrofen rykkjer nærare. Men ei slags vårløysing er kanskje på veg.
Framtidsfrykt. Trist å tenkje på: Unge par nøler med
å setje ungar til verda på grunn av miljøkrisa. Tanken på ei framtid med
smeltande polar og ørkenspreiing, øyar som sekk i havet og desperate
klima-flyktningarar ved grensene våre er ikkje til å halde ut. Det er ikkje
berre Greta Thunberg som refsar foreldre- og besteforeldre-generasjonen for å
undergrave livsvilkåra for dei unge som skal arve jorda. Ungdomsidolet Miley
Cyrus og den radikale amerikanske demokraten Alexandria Ocasio-Cortez er blant
dei som spør om det er ansvarleg å få born no når framtidsutsiktene er så
skumle. Her i landet har Erna Solberg oppmoda norske kvinner om å få fleire
born utan at det har vist att i statistikken. Det har fleire grunnar, men framtidstrua
som skapte babyboomen i etterkrigstida, har i alle fall fått ein alvorleg
knekk.
Vår i lufta. Men ting skjer, ting som vi knapt kunne
tenkt var mogleg berre få år tilbake. Klimafornektarane, med sin flokkimmunitet
mot vitskaplege fakta, har ikkje lenger
publikum med seg på same måten. Flakk-Gruppen byggjer anlegg for
hydrogenproduksjon og dei gjer det på Hellesylt. Det var det få som drøymde om
for nokre år sidan.
I den vakre vårmånaden mai valde seks av ti nybilkjøparar her i landet ein bil
som var hundre prosent elektrisk. To av ti valde hybrid. Dei to som valde diesel-
eller bensinbil står i ferd med å bli
forbikøyrde av utviklinga. I den same mai månad la det internasjonale energibyrået
IEA, - gjennom alle år kjend som
oljeindustriens beste ven - fram ein rapport der dei slår fast at det ikkje er
behov for fleire olje- og gassfelt her i landet. Det vil vere nok å tømme dei
felta som alt er i produksjon.
I vakre mai fekk vi også melding om at generalforsamlinga i oljeselskapet
Exxon Mobile, eit oljesamfunn som gjennom mange tiår har hatt rykte for å ta
lett på miljøet, har bytt ut to styremedlemmer, for å dra selskapet i ei meir
klimavennleg retning. Dei som pressa fram avgjerda, var ikkje naturvernarar,
men profesjonelle investorar. Dei fryktar tap om ikkje selskapet dei er
medeigar i tek skeia i ei anna hand. Ei fjerde melding, også frå mai i år: Ein
naturvernorganisasjon i Nederland saksøkte oljeselskapet Shell for å ureine miljøet.
Domstolen dømde selskapet til å kutte utsleppa sine med 45 prosent innan 2030.
Kva så med vårt eige oljeselskap Equinor, nøyer dei seg berre
med namneskifte? Ja, dei pumpar olje som før, men dei har også bygd verdas
første havvindpark ved Skottland og utviklar verdas største havvindpark på Doggerbank. Dei
skreiv også nyleg kontrakt om å levere straum til New York frå to havvindparkar
utanfor austkysten av USA. Det er ikkje
nok til at dei når sin del av Paris-målsetjingane, men i alle fall ein start.
Konkrete mål. -Før var det nok at oljeselskapa kunne
vise til at dei hadde begynt å investere i noko fornybart. No må dei vise at
dei har ein strategi som tek dei til Paris med konkrete målsetjingar undervegs,
sa sjefanalytikar i Nordea, Thina Saltvedt i Klassekampen 29. mai. Investorane er i ferd med å sjå risikoen ved
fossil-investeringar og har oppdage utsiktene til gevinst ved å satse grønt. Sjefanalytikaren
meiner vi no nærmar oss eit knekkpunkt.
Ketsjup. Når pengefolk snakkar klima, er det ikkje av
plutseleg idealisme. Dei gjer det fordi det er bra for business. Eksempla frå mai
tyder på ei vårløysing. Nokre kallar det ketsjup-effekten. Du ristar og ristar
på ei flaske og ingen ting skjer. Og så kjem det plutseleg svære mengder samtidig.
Det grøne skiftet kan kome raskare enn dystre profetiane kan
tyde på. Men dei som meiner vi har det
bra som vi har det og ikkje heng med i svingane, kan plutseleg finne seg att utdaterte
og langt bak i køen.
God sommar!
( Synspunkt Nyss)
Kommentarer
Legg inn en kommentar