Møbelnamn
Namn seier mykje. Det ligg omtanke bak val av namn. Kva
synest vi er fint, kven vil vi kalle opp att? Kva slags namn tenkjer vi vil gjere
inntrykk, kva namn er lette å hugse.
Namna seier mykje om dei som vel namn på sine hjartebarn.
Det gjeld folk og kjæledyr. Og det gjeld møblar.
Den amerikanske storgangsteren Al Capone skal ha brukt å presentere seg som møbelhandlar.
Han hadde ei bruktsjappe for møblar som dekkadresse. Dette var i dei tider i
Chicago då ei felekasse like ofte kunne innehalde ein maskinpistol som ein fiolin.
Det amerikanske møbelvarehuset Harvey Norman
hadde i mange år ein sofa som heitte Capone. Det seier kanskje
litt om kva ideal dei amerikanske møbelkundane har. Her i landet trur eg ikkje
ein har kalla opp nokre hardbarka kriminelle enno. Kanskje om det var ein folkehelt
som Gjest Baardsen. Men kongelege og adelege derimot – dei hadde namn som
møbelindustrien gjerne lånte. Og utanlandske hovudstader og badebyar. Og
kjendisar av alle slag og musikk. Og norske møbeldesignarar har alltid hatt veldig
sans for jazz.
Thonet heitte den første storseljaren blant
fabrikkproduserte møblar. Den austerrikske produsenten Thonet opererte rundt 1860. Han kalla stolane sine opp etter seg sjølv og selde 50 millionar av dei verda
over. Den som selde aller best var den som har blitt kalla Kafestolen.
I 1905 kom ein
regulerbar tysk kvilestol. Den heitte Sitzmaschine og var konstruert
av Josef Hoffmann. Det står ein liten
modell av den utstilt på Møbelmuseet. Eg har ikkje prøvd originalen, men han
såg veldig ubehageleg ut, sjølv om han kunne regulerast i ryggen.
Designaren Marcel Breuer var modernist og minimalist og kom
med ein modell han kalla B3 i 1925. Kollega Mart Stam hadde sin Stuhl
W1. Det var ganske minimalistisk,
det også. Seinare, når møbelutvalet vart meir variert, vart det meir viktig å
beskrive produktet. Dansken Hans B. Wegener kom med 3-Benet Skalstol i
1963. I 1964 kalla den finske produsenten Kukkapuro sin svingstol for Karuselli. Då forstår
du at den går rundt for ein.
Kva så med norske møblar? Her rådde lenge den sunnmørsk
puritanismen. Skrytenamn satsa ein ikkje på. Namna på modellane var helst til innvortes
bruk. Dei første korgstolane frå Sykkylven Kurvmøbelfabrikk vart lansert frå
1921 hadde namn som Nr. 70
og Nr. 71. På Hjellegjerde slo dei til i same tradisjon: Det var Nr. 110, Nr. 130, Nr.150 og Nr. 230. Berre ein sofa frå
Hjellegjerde hadde eit skikkeleg dronningnamn den første tida; Victoria.
Men så
tok det litt av: «Som svanen hviler på vannet, like godt vil De hvile på
Svane-madrassen,» reklamerte Ekornes. Og Svane var ikkje berre madrassar.
Svanett , «sofa, seng og bord i ett» kom
i 1956. Svane 4 hadde ikkje fjør, men var den første hudmodellen. Svane
Columbus var den første kvilestolen med vipp og sving.
Ingmar Relling døypte også dei første produkta sine med
nummer i starten. Men på sekstitalet var
det nyskaping, også i namnevegen. Det gjekk ikkje lenge før også sunnmøringane kasta
seg på den internasjonale trenden.
Relling var tidleg ute. Den samanleggbare Nordic frå 1954 var eit tidleg
eksempel. Han hadde ambisjonar utover dei norske grensene. I 1965 kom Siesta, som den gongen var eit
framandord på spansk for den sunnmørske middagsluren. Og så kom internasjonale namn
på løpande band; Base, Optima, Rest, Nobel, Flair. Namna var
ikkje berre pynt. Til dømes Combina
frå Ekornes, og namn som Flex og Wave var også namn som fortalde om kva slags produkt det var.
Skikkeleg nyskapande
var namnet Stressless. Det høyrest ut som engelsk, men det var Made in Sykkylven. Nærare
bestemt i hovudet til Erling Ekornes i marknadsavdelinga hos Ekornes. Han var ung og tok tida på pulsen.
På engelsk er stressless eit omgrep frå fonetikken og blir brukt om «trykklett
staving».
På norsk var stress moteord
nummer ein på syttitalet. Å vere stressa, det var noko som kjenneteikna folk med store oppgåver, stort
ansvar, mange ballar i lufta. Det var nesten positivt ladd. Men stress kunne
også gi magesår og det som verre var. Så då ein måtte stresse ned, eventuelt av.
Og å stresse av den gongen var å ligge rett ut i ein kvilestol og sjå på TV. Vart
ein for stressa, måtte ein stresse less, altså mindre, heilt til at ein kjende
seg heilt stressfri, altså stressless.
Når dei først byrja med skikkelege namn på møblar, var det først vanleg med norskklingande namn. Ekornes laga ein etterspurd sovesofa nokre år etter krigen. Dei var ganske åleine på marknaden med eit slik kombinasjonsmøbel og brukte namnet Sofa-seng.
Hjellegjerde slo til med Blinken og Bravo og En-To og gjorde stor suksess. Brunstad tok spranget då ein bikka sekstitalet og pynta modellane sine med namn som Oslo og Venus, King, Knoll, Sjeik og Roma. Brunstad ville signalisere luksus. Kvilestolen Rolls heitte nok oppatt etter Rolls-Royce. Tiki frå 1985 var nok oppkalla etter Kon-Tiki-ekspedisjonen. Det luksuriøse og urbane hadde appell. Lord og Diana var lånte fjør frå britisk adel. Kvilestolen i skinn fekk namnet Viking. Norrøne sjørøvarar hadde høg status både heime og ute.
Komande forsking må finne ut
kor mange norske møbelprodusentar som har brukt namn som Manhattan,
New York, London og Paris på sine møblar. Og det galt å ikkje vere beskjeden. Produsenten av
ein stol som kunne gjerast om til seng med eitt handgrep, valde namnet Genial
sengestol.
På sekstitalet var møbelbransjen i ferd med å bli
internasjonal. Då nytta det ikkje lenger med ein hjørnesofa som heitte Krå-kos,
som hadde fungert for Brunstad nokre
år. Hjellegjerde brukte eit namn som Arvo. Som høyrest ut som eit finsk mannsnamn. No valde ein fritt blant greske gudar og
stjernene på himmelen: Som Neptun, Vesta og Pollux. Og Capello,
som var ein kjend fotballspelar på denne tida. På syttitalet vart bransjen endå meir internasjonal. Då gjekk det i Carina, Fortuna, Colombi, Mira. Luna, Nova
og Capilla. Og naturlegvis: Corona. Dei skulle berre visst!
Trenden frå himmelrommet heldt seg også godt inn i
1980-åra. Vi hadde landa på månen. Vi
kalla møblane våre for Sirius, eller Pilot, Spring og Tilt.
Og det kom meir eksotiske namn; Sirrah, Targa, Salma, Altea og Riegel.
Den siste inspirert av den tyske turistbyen – eller kanskje endå meir truleg - den
populære Freia-sjokoladen med same namn.
Utanlandsk og kraftfullt skulle det vere, også i på
nittitalet. Som Mustang etter den amerikanske sportsbilen og Mirage
etter det franske jetflyet. Og så kom år 2000, det året då folk trudde at alle datamaskinar skulle krasje. Då var
det behov for fast leiarskap. Møblane
fekk namn som Alfa, Boss og Admiral eller adelsnamn som Hertug
og Lady. Eller ein lokka med det gode og avslappa liv og evig solskin: Living
og Sunset.
Formfin hengde seg også på den internasjonale trenden med
namn som Uno og Athene, Mobile, Swing, Thea og Venus. Di meir moderne
ein var, di kortare namn. L.K. Hjelle skifte ut sin tradisjonelle modellar med
moderne former og brukte minimalistiske og ganske uforståelege namn som Fam, Hal, Kavai og My.
Ikea er eit tilfelle for seg. Dei skal visstnok ha hatt eit system som gjekk ut på at sofaer og stolar skal heite opp etter svenske byar og
tettstader, at kjøkkenting skal heite opp att etter sopp eller fisk og
hagemøblar skal heite opp att øyar og at tepper skal ha namn etter danske
tettstader.
Praksisen har nok blitt litt utvatna dei siste tiåra. Vel
har dei lenestolar som heiter Ekenäset, Volmar eller Flintan, eller Uhuru, Pello eller Tullsta. Ei spisestue heiter Smaska og ein gynge-elg
fekk namnet Ekorre – altså ekorn på svensk. Noko seier meg at dei som lagar IKEA-namna
i dag ikkje alltid har adresse Småland
lenger.
Ein trend har vore
stor gjennom mange tiår: Musikk. Vi har
naturlegvis hatt namn som Menuett og Symfoni. Hjellegjerde hadde
sofagruppa Mantovani, som var eit orkester som ofte var i Ønskekonserten.
Men det er tydeleg at jazz hadde appell til designarar. Peter Opsvik og saksofonen
hans var med i Christiania Jazzband i ein mannsalder. Svein Gusrud spela i Stokstad
Jensen og Magnolia. Jan Lade spelar i
Blue Horn og Svein Asbjørnsen i Credo Brass. Ikkje rart at også Ekornes følgde
opp med Stressless Jazz og fekk designpris
for den. Og dei gjekk vidare med Stressless Blues.
Likevel, få formgivarar har brukt jazzen meir gjennomført
enn designarane Dave Vikøren og Steinar Hindenes i designgruppa Circus frå
Bergen. Her finn vi møblane Mingus etter Charlie Mingus, Coltrane
etter John Coltrane, teppet Cannonball etter Cannonball Adderley, stolen
Monk etter Thelonius Monk, Dei har også laga sofaen Be Bop og skapet Bird etter
Charlie «Bird» Parker, modellane Young etter Lester Young, Webster
etter Ben Webster og Getz etter Stan Getz.
Og så, når vi er her på Cylindra, så kan vi ikkje anne enn kose
oss med Peter Opsvik sine nyskapande namn. Her kan vi sjå på skåp med
namn som Naboskap, Lidenskap og Troskap. Ta ein runde rundt i huset
og kos dykk med spenstige Opsvik-namn.
Men det er noko til: Skal ein selje, må ein ikkje vere blyg.
Det har møbelseljarane lært seg. I den tøffe møbelmarknaden må ein ligge frampå
med heile brystkassa. Og då er det
merkeleg at det skal vere så vanskeleg å få dei til å merke møblane sine med fabrikknamn.
Kjøper du eit kjøleskap eller ei vaskemaskin eller ein bil,
så reknar med at produsenten har plassert varemerket og modellnamn godt synleg og klistra det fast på produktet. Det gjorde ikkje møbelprodusentane for nokre tiår sidan.
No har dei så smått og stort sett kome ut av skapet.
Det er eit mareritt
å vere møbelhistorikarar skal identifisere gamle møblar. Som regel er det ikkje
så mykje som ein del av eit klistremerke til hjelp. Det finst ei heil
sjølvhjelpsgruppe ute på nettet som hjelper folk med å finne ut kva møblar dei har kjøpt på
brukthandel. Der sit det folk som likar å drive detektivarbeid for å finne produsent
og produksjonsår på eldre møblar.
Eg har naturlegvis spurt møbelfolk kvifor dei er så
hemmelegheitsfulle. Eg har aldri fått eit skikkeleg svar, dei seier berre at
det var ikkje vanleg den gongen. Folk som er meir mistenksame enn eg er, kunne ha trudd produsentane heldt sin identitet skjult for å sleppe at dei som hadde reklamasjonar ikkje skulle få tak i dei, Det trur ikkje eg. Eg reknar med at det er ekte sunnmørsk blygskap og frykt
for å stikke seg ut som ligg til grunn. Takk for meg.
(Kåseri, Venneforeininga til Norsk Møbelfaglig Senter på Galleri
Cylindra 28.11.2021.)
Kommentarer
Legg inn en kommentar