Gildehall for næringsutvikling
Dei arkeologiske funna på og ved Auremarka tek oss ti tusenår tilbake i tid. Tenkjer vi ti år
fram, har kanskje reiseliv blitt det ekstra beinet som den sårbare og einsidige
industribygda Sykkylven kan kvile på.
I tiår på tiår har
store mengder turistar passert Sykkylven utan å stoppe. Mange om bord i
cruiseskip, mange i buss eller privatbil. Så langt har sykkylvingane hatt nok
med å lage møblar og overlate til andre å vere vertskap for ferierande frå inn-
og utland. Vi står ikkje tilbake for nokon når det gjeld fjord og fjell. Men
kan den historiske Auregarden med alle sine arkeologiske funn utviklast til å
bli vår nye attraksjon?
Ja, meiner
konsulentselskapet Segel AS, som for få år sidan hjelpte opplevingssenteret
Sagastad på Nordfjordeid i gang. Selskapet har levert ein forstudie om bygging
av ein Gildehall på Auremarka til kommunen. Segel AS tenkjer seg gildehallen
som ein del av ein førhistorisk park på Auremarka. Her står eit bronsealderhus
alt ferdig. Kommunen har planar om å
markere kor stor Gildehallen er ved å legge ein hellelagd festplass over dei
freda tuftene. Krona på verket vil bli å gjenreise Gildehallen slik han ein
gong kan ha sett ut. Konsulentselskapet har rekna ein kostnad på totalt 40
millionar kroner. Planen skal kunne gi overskot i løpet av dei to første
driftsåra.
For ting ligg til godt til rette: På Aure ligg historia
bretta ut framfor oss – frå steinalderfunn i bakken ovanfor Storgata via tufter
frå bronsealder til store mengder spor etter jarnalderbustader ovanfor kyrkja.
På den grøderike flata ved Aurefjøra har det vore drive landbruk i minst 3000 år. Det er mykje historie under torva.
Og Sykkylven ligg strategisk til i turistløypa.
Arkeologien har mange svar. Men det er også mykje vi ikkje
veit. Det gir rom for fantasien. Vi kan ta utgangspunkt i funnet av ei
hasselnøtt som truleg har vore rista over eit bål for 10.000 år sidan. Vi kan
filosofere over kva dei tenkte på, steinaldermenneska rundt bålet?
Korleis hadde bronsealder-familien det, tusen år før vår
tidsrekning? Dei hadde forlengst blitt fastbuande jordbrukarar. Dei kunne å
spinne og veve og lage keramikk. Mykje kan tyde på at det var ei tid prega av
fred og velstand. Rike kvinnegraver tyder på at kvinnene vart haldne høgt i ære.
Nokre forskarar har argumentert for at dette var ei tid for kvinnemakt og
likestilling.
Så til den
imponerande Gildehallen. Ein reknar med at hallen vart reist ein stad mellom
500 og 750 år etter vår tidsrekning. I året 536 må det ha skjedd ein frykteleg
naturkatastrofe. Noko formørka himmelen og skjulte sola, viser analysar av
plantelivet både i Nord-Europa og i Nord-Amerika. Kanskje var det ein
meteoritt, kanskje eit enormt vulkanutbrot. Dei nordlege områda vart hardast
ramma. Kanskje så mange som halvparten av menneska i Norden døydde av svolt
eller kulde. Truleg er det dette segntradisjonen i Norden omtalar som
Fimbulvinteren, som skal ha vart i heile tre iskalde år. Og ein eller annan
gong ikkje langt unna i tid bygde sykkylvingane altså ein av dei største
kjende gildehallane i Norden!
Spennande er også historia om Aura-Pål, som levde berre for
knapt tusen år sidan. Far hans var Skofte Ogmundson frå den mektige Giske-ætta.
Han kom i krangel med kong Magnus
Berrføtt, tok med dei tre eldste sønene og stakk frå landet. Han siglde med fem
langskip gjennom Norvasund (Gibraltar)
og vidare inn i Middelhavet i det som har blitt kalla det første norske
korstoget. I Roma døydde han. Heller ikkje sønene kom levande frå turen, men
nokre av mennene hans kom tilbake og kunne fortelje om opplevingar i Jerusalem
og Miklagard (Istanbul).
Vesle Pål var for ung til å vere med og stå att på stranda då faren og brørne drog ut. Seinare arva han mange garda og mykje gods, men har nok budd mest i Sykkylven, sidan namnet hans vart knytt til Auregarden.
Gildehallen i Borg i Lofoten er den største i landet med sine 83 meter - 26 meter lengre enn Gildehallen i Sykkylven. Tuftene tidfesta til rundt år 500. Vikingmuseet i Borg , teikna av arkitekt Gisle Jakhelln, har vore ein suksess. Omsetning ca. 60 mill. på årsbasis og ca. 100.000 gjester. Foto: Jørg Hempel. (Creative Commons)
Dugnadslaget
Aura-Påls vener, som står bak bronsealderhuset, tek mål av seg til følgje opp
arbeidet med Gildehallen. Men med Gildehallen nyttar det ikkje med dugnad, her
må private investorar inn. Vi ventar at kommune stiller tomt til rådvelde
og følgjer opp med planarbeid og
prosjektmidlar., noko som må på plass først. Vi meiner at ein Gildehall både vil kunne vere ein viktig formidlingsarena
for historia vår og samtidig ein spennande plass g for møte, representasjon og produktlansering for næringslivet på Sunnmøre.
(Aura-Påls vener 20. des. 2021)
Kommentarer
Legg inn en kommentar