Opprørar og vaksinemotstandar
I pandemiåret 2020 har sykkylvingar lydig
følgt staten og helseministerens strenge påbod medan vi ventar på den
etterlengta vaksinen som skal gjere alt
normalt igjen. Så føyeleg var ikkje den frittalande bondehøvdingen Lars Nilsen Aurdal (1742 – 1824.)
Nils-Lars
frå Aurdal var ein høvdingskikkelse blant bønder og småfolk i Sykkylven. Så var
han også ein av etterkomarane etter den vidgjetne bondeopprøraren Store-Rasmus. Rasmus
Ingebrigtson Myklebust vart fødd i 1595 i Ørskog og slo seg til på Myklebust på
Harøya. Der vart han etter kvart ein leiar blant bønder og fiskarar i området.
Han kjempa for interessene deira og klaga
blant anna på at futen tok inn for mykje skatt. Han skal også ha oppmoda allmugen
til å ta livet av futen Iver Andersen på Gjermundnes – ein hard
skatteinnkrevjar som gjekk under namnet «Bondespiller». Det førte til at Store-Rasmus vart dømd til
livsvarig straffarbeid i jarn på Akershus.
Ideal
Den myndige bondeføraren vart ikkje gløymt så raskt på Sunnmøre. Det
er naturleg at historiene om opprøraren frå Harøya levde i slekta og at dei gjorde inntrykk på Lars i Nils-garden på Aurdal.
Lars skulle også vise seg å vekse opp til ein som kunne stå opp mot øvrigheita.
Både Rasmus og Nils-Lars frå Aurdal er
omtalt i Halvdan Kohts klassiske bok Norsk Bondereising, som fortel om folk som
tok kampen opp mot styresmaktene og kjempa for bøndene sine kår. Men nokon
framstegsmann var Lars Aurdal nok ikkje. Han var først og fremst ein
konservativ bonde som ville verje gammal skikk. Men gjennom å forsvare
hevdvunne gamle rettar, vart han likevel ein opprørar, skreiv Koht.
Nils-Lars
skulle også bli ein mann som vart lytta
til og sett opp til. Han vart tidleg partseigar i ei jakt som han og
kompanjongane gav namnet «Massine, Christine Søkelvine» etter konene og
heimbygda. Med denne jakta gjekk han
turar til Bergen med bondevarer og kom heim med populære forbruksgjenstandar
som bøndene ville kjøpe. Han var ein kremmar som også hadde sans for småhandel.
På kyrkjebakken gjekk han ofte med ein heil stabel med hattar på hovudet. Desse
selde han til sambygdingane. Handelsverksemda sette han i stand til å kjøpe opp
jordegods. I tillegg til Nils-garden på Aurdal der han budde, kjøpte han tre
bruk på Grebstad, eitt på Lyshol, eitt på Andestad, eitt på Kjemphol og to bruk
på Hjortdal.
Han var ein mann det gjekk mange historier om. Han skulle
vere stor og sterk. Ein gong skulle han ha kome brått på to ettersøkte karar
som låg og sov i ein færing på Flisfjorden. Han slo den eine i svime, batt dei
begge og førte dei til futen. Dei to ugjerningsmennene var nemleg etterlyste
for drap. Tradisjonen fortel at han fekk ein medalje for denne dåden
Meiningar
Nils-Lars hadde kraftige meiningar og var ikkje den som
skjulte dei når han var ute blant folk. Når presten i kyrkja gjekk inn i
sakristiet etter gudstenesta, kunne han seie: «Der for han, vargen». Han var
kraftig irritert over at prestane og andre embetsmenn som han meinte velta
stadig nye utgifter over på bøndene. Ei historie fortel om han ein gong han
skulle betale tienda og leverte lite matnyttig lettekorn. «Det er meget agner i Lars sitt tiendekorn»,
hadde presten sagt. Han fekk svar: «Det er mykje lettekorn i preikene
til presten også.» Han gjekk ikkje av
vegen for å kritisere presten både for å halde alt for korte preiker og for å
syngje dårleg under gudstenestene.
Han hadde reist mange turar til Bergen og blitt kjend med
haldningar og meiningar elles langs kysten. Det vart snakka mykje om oppstand
mot griske embetsmenn. Lars hadde både kunnskapen og sjølvkjensla som måtte til
for å hevde sin rett og plante opprørslyst i bøndene. Styresmaktene såg at han
kunne vere ein farleg mann. Derfor vart det også viktig at han vart sett på
plass.
Soknepresten var ikkje berre Guds representant i
lokalsamfunnet. Han hadde også administrative
oppgåver for regjeringa. Han skulle blant anna overtyde eit uvitande folk
om klokskapen i påboda som regjeringa til ei kvar tid kom med. Eitt av dei var
Vaksinelova av 1810, som gjorde vaksinasjon med kukoppar obligatorisk for alle.
Dei vaksinerte skulle skrivast inn i kyrkjebøkene. Var dei
ikkje vaksinerte, skulle dei korkje få konfirmere seg eller gifte seg. Vaksinasjon
var unødvendig og ville heller ikkje fungere, meinte Nils-Hans. Han skulle ha eggja
sambygdingane mot vaksinelova i alle
folks påhøyr på kyrkjebakken. Dette med vaksine var berre noko som embetsmennene
hadde funne på for å få fleire inntekter frå bøndene, meinte han.
Slike opprørsk replikkar skapte ikkje akkurat god stemning
mellom Aurdal-bonden og sokneprest Joachim Kjelstrup, som i 1810 gav denne
attesten: Lars Aurdal var kjend som «som Oprører og en Hovedmand for alle Partier,
Bevægelser hos og iblant Almuen – endog i den militære Stand som Soldat var han
berygtet som et urolig Hoved, som Formand for Mytteri og Sammenrottelser, og
gjorde sig mere en een Gang skyldig i fræk Lovløshet og den strafverdigste
Insubordinasjon mod sine Overmænd». Den nesten hatefulle tonen i uttalen kan gi
mistanke om at no skulle den uregjerlege Aurdal-bonden takast ein gong for
alle.
Ei farleg tid
Åra etter hundreårsskiftet var ei vanskeleg og farleg tid. I
åra rundt 1800 kom det fleire år med uår og feilslått fiske. Det ramme særleg
kystdistrikta. Hungersnaud truga, spesielt ute på kysten. Napoleonskrigane rasa.
Danskekongen hadde satsa på feil hest. Britisk blokade førte til mangel på korn
og hungersnaud. Det var på denne tida Ibsens Terje Vigen prøvde å ro til
Danmark etter korn og hamna i prisonen i England. I 1807 kom det britiske
bombardementet av København som øydela den danske flåten og sette skrekk i
innbyggjarane. København var også Noregs hovudstad. Då krigen tok slutt, var Napoleon-vennlege
Danmark den tapande part. Det skulle
føre til at Danmark måtte gi avkall på Noreg, noko som igjen førte fram til
grunnlovsforsamlinga på Eidsvoll i 1814.
Storpolitikken hindra ikkje at vitskapen gjorde framsteg.
Eitt av framstega var at ein no var i ferd med å setje ein stoppar for sjukdommen
koppar, som hadde herja Noreg i alle fall sidan 1200-talet. Koppar er sykkylvsk
«poke/pøke» eller pokker på dansk. Vi kjenner det att også som banneord. Koppar
er ein smittsam virussjukdom som fanst her i landet heilt fram til etter 1900. Vi
veit at det fanst på Island i år 1240. Dei kalla det bolna eller bonnasott.
Bolna eller på norsk bole, tyder i følgje Ivar Aasens Norsk Ordbok «hævelse».
Jamfør trebole.
Koppar har fått namnet sitt av dei kopp-forma arra som
blemmene etterlet seg på kroppen. Den alvorlegaste forma for kopper førte til
at 20 til 40 prosent av dei sjuke døydde. Dei som overlevde, vart vansira av
koppeforma arr i huda. Virus-sjukdommen smitta gjennom kontakt med materie frå
utslett og gjennom dråpesmitte frå hals og svelg eller frå klede og sengetøy. Ti
til fjorten dagar etter ein er smitta får ein raude flekker i huda som seinare blir
materiefylte blemmer. Ein kjenner seg kvalm, får feber, hovudpine og kramper.
Ein har store smerter og allmenntilstand blir dårleg. Koppar var som korona og
ramma høg og låg, uansett rang og
stilling. Då vaksinen kom, var styremaktene raske til å ta den i bruk.
Den første metoden som vart teken i bruk for å kjempe mot
sjukdommen, var såkalla inokulasjon, der ein poda inn smittestoff frå ei mild
form for koppar i pasienten for å framkalla immunitet. De første som prøvde seg
her i landet var kirurgen Wasmuth i Trondheim i 1755. I 1771 vart 103 born
mellom to og sytten inokulert av stadsfysikus Büchner og prost Krogh i Bergen.
Hr. Heiberg inokulerte heile 562 born i Nordfjord. Dei som fekk denne
behandlinga vart sjuke, men i dei fleste tilfelle vart anfallet mildt og det
ville gi immunitet resten av livet. Det var naturlegvis ein viss motstand mot
denne risikable metoden. Nokre få av borna døydde av behandlinga og nokre vart
vansira, men ikkje på langt nær så mange som i resten av folket.
Alt i 1801 utførte stabskirurg Magnus Andreas Thulstrup den
første vaksinasjonen i Christiania. I starten brukte ein smittemateriale frå menneske,
men etter kvart fann ein ut at ein kunne hente smittestoffet frå dyr, oftast
kyr, som var smitta. Vaksine har fått namnet sitt frå det latinske namnet for
ku, vacca.
I 1810 vart bestemt
at born som ikkje var vaksinerte ikkje skulle få konfirmere seg. Prestane fekk
ei viktig rolle i å handheve regelverket. For å halde oversikta vart det laga
ein ekstra rubrikk i kyrkjebøkene der ein skulle føre inn om vedkomande var
koppevaksinert. Prestane fekk i oppgåve å passe på at alle konfirmantar og alle
brudefolk var vaksinerte og hadde godkjent vaksinasjonsattest.
I dagens samfunn er vaksinemotstand sjeldan. Det har vore
demonstrasjonar mot Covid-19-tiltaka til dømes i Tyskland, men stort sett vonar
alle at ein effektiv vaksine skal bli utvikla snarast råd. Nordmenn har hatt gode
erfaringar med vaksine. Koppar er i dag rekna som utrydda. Den obligatoriske
koppevaksinen i Noreg varte til 1976. WHO rekna sjukdommen koppar som utrydda i
heile verda 1980.
At det skulle gå slik, kunne ikkje Nils-Lars på Aurdal vite.
For han var vaksinen endå eit pålegg frå embetsmennene for å tyne meir pengar
ut av bøndene. Vaksine hadde heller ikkje nokon effekt, meinte han. Han heldt
ikkje meiningane sine for seg sjølv.
Dette var slike argument øvrigheita absolutt
ikkje ville høyre. Sokneprest Kjeldsrup drog Nils-Lars for retten. I September 1810
vart retten sett i huset til lensmann
Astrup på Blindheim. Klagemålet var forsiktig formulert, men fullt av
sprengstoff.....at det her i Søkelven skal gives Personer hvoriblant i
Særdeleshed en Lars Nilsen Overdal, der har Dristighed nok til at nedsætte hos
Almuen de kgl. Anordninger saa som den av 3. April d.aa. om Vaxination».
Dyrlege
Hovudvitne i saka mot Nils-Lars var Hans Jørgen Aure, fødd 1782, frå
Kapralgarden på Aure. Han var for ein ekspert å rekne. Han var den første dyrlegen
på Sunnmøre. Han hadde studert i fire år og var ein av dei førti første som tok
veterinæreksamen i København. I 1806 er han nemnd i samband med at han får tilbakebetalt sine
studieutgifter av Bergen Stift. Som motyting skulle han slå seg ned og praktisere
innanfor stiftet utan godtgjersle frå det offentlege.
Å vere dyrlege var inga gullgruve. Gardbrukarane hadde ofte
ikkje pengar å betale med. Det var vanskeleg å få dekka utgiftene. Han har slått seg ned i heimbygda Sykkylven. Han
er på dette tidspunktet 38 år, gift og bur på ein plass under garden Overå. Vi
veit at han har det trongt økonomisk og at han i 1815 søkjer om fast løn som veterinær
i Romsdals amt, noko som han truleg fekk avslag på. Seinare i livet veit vi at
han budde i Bergen.
I følgje referatet
frå rettssaka fortalde han at han hadde treft Nils-Lars på landevegen på Eidem.
Lars hadde spurt kvar han kom i frå og veterinæren hadde svart at han hadde vore på Kjemphol og vaksinert ein liten
gut.
-Trur du vaksinasjon er påliteleg for å verne mot ekte
barnekoppar, hadde Lars spurt. Dyrlegen svara at Kongen nok ikkje hadde bestemt
obligatorisk vaksinasjon dersom behandlinga ikkje var påliteleg.
Lars viste til
erfaringane i Borgund, der doktoren hadde vaksinert born for tre år sidan. Dei
same menneska har no fått barnekoppar igjen og mange av dei er døde, sa han. Det
kan vere fordi vaksinen ikkje var ekte, meinte
dyrlegen, som spurte om ikkje han trudde at Forsynet hadde gitt dei
dette middelen mot smitten.
Det meinte ikkje Lars. Han hevda tvert om at vaksinasjonslova
var noko som regjeringa hadde funne på for skaffe fleire embetsmenn eit
levebrød. Han trudde ikkje at kongen visste noko om dette, men det var folk i
regjeringa som bestemte dette etter eige forgodtbefinnande. Det hadde nok dei
høge herrar ikkje våga å gjere utan at kongen hadde underteikna, innvendte
dyrlegen. Jau, dei finn på så mykje
hokus-pokus, sa Lars. Yngstesonen min har ikkje hatt koppar og han skal ikkje
vaksinerast før han får det naturleg.
Dyrlegen opplyste om
at vaksinasjonen ikkje skulle koste noko. Staten skulle dekkje utgiftene. Og
han minte Lars om at sonen hans ikkje
kunne bli konfirmert om han ikkje var vaksinert.
-Då er betre vi blir heidningar eller ville beist på marka om
ein må ha vaksine for å bli konfirmert eller ektevigd, meinte Lars. Ei slik
ordning ville føre til at religion og gudsfrykt ville forsvinne. Folk ville
misse lysta til å gå til kyrkje, for korkje preika eller songen lokkar. Om
fleire ville som han, kunne vi redusert prestens inntekter til det halve, fordi
preikene er så korte. Desse påboda om vaksinasjon og meir til skulle han trø
under fot og trakke ned i skiten. Og dette var han ikkje redd for å seie, om så
Kongen og øvrigheita hadde stått ved sida av han og høyrt på.
Har du høyrt slikt utilbørleg snakk hos andre.
Var Lars full eller forvirra eller har han ein skrue laus, spurde
dommaren. Nei, svara dyrlegen. Lars var kjend for å vere edrueleg. Mange rekna
han også for å vere ein fornuftig mann.
Oppvigleri
Fleire vitne vart førte og dei støtta opp om vitnemålet frå
Hans Jørgen Aure. Dei kunne fortelje at Lars hadde sagt om mange av dei siste
kongelege forordningar «at han kunde bli gal i
hovedet av dem, og at han bryder sig Djævelen om dem». At han forkynte at
han ikkje ville etterleve, men bryte dei pålegga som forordninga inneheldt, var
oppvigleri mot Kongen og lovlege styresmakter. Det var eit alvorleg brotsverk.
På dette tidspunktet
må Nils-Lars ha forstått at han måtte gjere avbikt, skulle han berge liv og eigedom.
Då han vart kalla inn for å forklare seg for retten, melde han seg sjuk og
vidare rettssak måtte utsetjast. Då retten vart sett igjen to veker seinare i tinggarden
i Spjelkavik, møtte 67-åringen som han skulle. No var han ikkje like høg i hatten
som i samtale med sambygdingar på landevegen heime i Sykkylven. Han sa at han kunne
ikkje hugse at han hadde kritisert forordninga om vaksinasjon. Men han hadde
drege kukoppe-innpodinga i tvil fordi vaksinasjonen ikkje hadde fungert i
Borgund.
-Var han skjenkt eller forvirra på heimveg frå kyrkje, ville
dommaren vite.
Han hadde vore til kyrkje og kjende seg sjuk etterpå,
fortalde han. Derfor følgde han sonen sin til heimen hans på Aure og la seg på
senga. Då han vakna etter ein halvtime, gav sonen han eit glas brennevin og ei skål med øl. Då
kjende han seg betre, og byrja på heimvegen til Aurdal. På denne turen trefte
han dyrlegen og fleire andre. Han presenterte seg for retten som gammal og
avkrefta og ein som lett vart rusa. Han tilbaud seg å betale 100 riksdalar i
mulkt den lokale skule- eller fattigkassa for å få saka ut av verda.
Også sonen var
innkalla som vitne. Han kunne stadfeste at faren i sin høge alder var så svekka
at han kunne bli rusa av to glas brennevin – ja til og med berre av godt
øl. Han kunne fortelje at når faren vart
irritert, var han på ingen måte herre over seg sjølv. Då seier han både det han
meiner og ikkje meiner, fortalde sonen.
Landsforvist
Det hjelpte ikkje å hevde seg svak og påverka av alkohol.
Påtalemakta var nådelaus og ville ta oppviglaren ein gong for alle. Dei
styrande ville markere eit eksempel. Soknepresten, som hadde levert den
drepande attesten mot storbonden frå Sykkylven, såg sitt snitt til å ramme sin
gamle fiende. I dei ufredelege tidene
det var internasjonalt, var det ekstra viktig å statuere eksempel og vise at
sentralmakta hadde kontroll.
Danmark - Noreg var i
krig og blokade. Det var opprørstendensar på kysten. Dei styrande kunne ikkje
vere ettergjevande, det ville gå ut over moralen i samfunnet. Ikkje ein gong
som ein gammal og drukken bonde i Sykkylven kunne visast nåde. Sorenskrivar Kildal skreiv
dommen og meddommarane Anders Olsen Blindem og Jørgen Jørgensen Vig slutta seg
til med påhalden penn. Lars Nilsen Overdahl vart dømd for å ha lasta og talt
formasteleg om dei kongelege anordningar, og spesielt om vaksinasjon. Som
straff skulle han bli forvist frå Kongens rike og land, heitte det i dommen. Han
måtte i tillegg betale utgiftene som retten hadde hatt.
Tradisjonen fortel at
dommen seinare vart omgjort til ei større bot. For å greie å betale denne måte
han selje ein del av jordegodset sitt, blant anna eit bruk på Lyshol. Etter
dette levde han i Nils-garden på Aurdal resten av livet. Han vart 82 år gammal.
Kjelder: Ola Tandstad. Sykkylven i eldre tid. Sykkylven sogenemnd
1962.
Kjetil Tandstad: Orrfugljakt og presteplage. Årbok for
Sykkylven 2018.
Reidar Skarbø: Den første dyrlegen på Sunnnmøre. Årbok for
Sykkylven 2014.
Morten Tryland: Kopper og koppevirus – 200 år siden den
første vaksinasjonen i Norge. Tidsskriftet Den norske legeforening 2001.
Halvdan Koht: Norsk Bondereising. Oslo 1926.
Kommentarer
Legg inn en kommentar